Coren e ABANCA renovan o seu compromiso de colaboración para traballar polo desenvolvemento do sector agroalimentario galego

O conselleiro delegado de ABANCA, Francisco Botas, visitou hoxe as instalacións do Grupo Coren en Santa Cruz de Arrabaldo, onde se atopa a sede da sede da cooperativa e o seu Centro de Procesado Avícola. Alí foi recibido polo presidente de Coren, Manuel Gómez-Franqueira Álvarez; acompañados da vicepresidenta da cooperativa, María Gómez-Franqueira Otero, e do director xeral, Emilio Rial.

A visita desenvolveuse no marco da colaboración institucional entre ambas as entidades, que renovaron así o seu compromiso común de seguir traballando polo desenvolvemento do sector agroalimentario galego.

No encontro, o conselleiro delegado de ABANCA puido coñecer de primeira man a actividade que desenvolve Coren, a principal cooperativa agroalimentaria cárnica de España, integrada por máis de 7.000 familias entre socios e traballadores. Ademais, os responsables de ambas as entidades analizaron a situación do sector agroalimentario galego e os retos no contexto socioeconómico actual. Neste sentido, o presidente de Coren, Manuel Gómez-Franqueira, agradeceu a ABANCA a súa colaboración permanente coa cooperativa, á que considera un “socio estratéxico” polo apoio continuo que presta aos proxectos que acomete o Grupo.

Pola súa banda, o conselleiro delegado de ABANCA amosou “o compromiso do banco coa economía galega e especialmente co sector primario como motor de desenvolvemento do rural”. Neste sentido, destacou “a posición de liderado de Coren como un dos referentes no tecido económico da comunidade” e reiterou “o seu apoio aos proxectos de crecemento do grupo”.

_{(*) Achégase fotografía da visita na que aparecen (de esquerda a dereita): María Gómez-Franqueira, vicepresidenta de Coren; Francisco Botas, conselleiro delegado de ABANCA, Manuel Gómez-Franqueira, presidente do Grupo Coren; e Emilio Rial, CEO de Coren.}

COMPARTIR: