Preparación Comezarase por facer a base do risotto, para o que se cortará a cebola e o allo para facer un sofrito na tixola. Ao mesmo tempo, mentres se fai o sofrito, cortarase tamén a tenreira en cadrados e porase a cocer sobre uns 20 minutos, o que fará que estea máis branda e zumenta para o risotto, aproveitando tamén o caldo da carne como fumet. Unha vez que o sofrito estea dourado, engadiranse os anacos de carne xunto coa cullerada de tomiño e unha pouca pementa, deixando que se mesture todo uns minutos cun chorro do fumet preparado previamente. Agora é o momento de pór o arroz especial para risotto e remexer todo ben. O fumet que se engadira desaparecerá en pouco tempo, así que haberá que engadir máis fumet para que se vaia facendo o arroz. É importante telo a man, xa que este tipo de arroz consome bastante auga. Cortaranse os espárragos trigueiros ao gusto e engadiranse xunto cos chícharos. Tamén se engadirá sal ao gusto Deixarase cociñar a lume lento, vixiando que non quede sen auga ou se pegue. Pódese deixar arredor de 20-25 minutos, dependendo da potencia e tendo en conta que unha vez que se apaga o lume, hai que o deixar repousar 5 minutos. Se se quere, unha vez que estea case listo, pódese engadir un pouco queixo parmesano raiado. Daralle un toque delicioso. Presentación Pódese servir o risotto nun prato medio fondo se se quere que quede caldoso.
